作者：沈嘉禄
沪语改写：边秦翌
讲述：孙维陵
推荐、指导：丁迪蒙
编辑：王乙其
震泽古镇有家仁昌顺，是始创于清同治年间个老字号。搭所有糕饼业铺子一样，以前店后作坊模式起步，历经迭代，老而弥新。我每趟到震泽宝塔街去白相，必定要到砥锭桥边个仁昌顺兜一圈，买几样茶食带回上海。
仁昌顺虽然规模勿大，但是店铺个式样搭宝塔街十分相谐，像只稳笃笃端坐个八角亭，低调就是腔调，拨人一种亲切踏实个感觉。营业员也是穿着清爽、举止得体个中年妇女，一口软糯个苏州闲话，“阿要带点回去让家主婆搭仔小人一道尝尝味道呀！”
仁昌顺常年供应袜底酥、定胜糕、炒米糕、巧果、麻饼、百合酥、芙蓉酥、桑椹糕、耳朵饼、玫瑰水晶糕咾啥数十种糕点，春暖花开时节还有麦芽塌饼、酒酿饼咾啥应市。
伊拉屋里个定胜糕搭常规制式相比，瘦身勿止一圈，但是因为精耕细作，玲珑可爱，松软适口，冷热皆宜，风味勿差于观前街浪几家名店个出品，有人认为反而有所胜出。我勒吴江宾馆、老镇源、嘉山书房、上海兴国宾馆侪吃到过迭款迷你型定胜糕，看来勒勒苏沪两地侪得到了广泛个认可。
伊拉屋里个麦芽塌饼、酒酿饼、笋尖团子咾啥也乡情可亲，并且也是迷你版个，精确个界定了茶食个体量，对应了现代人勒茶席浪个消费态势。
前几日，陆小星总经理快递拨勒我几样糕团，请我尝尝春味，开开盒头一看，有得撑腰糕、麦芽塌饼、酒酿饼咾啥。侪是我欢喜吃个。
撑腰糕勒平底镬子里煎一煎加热，香糯软韧，又有桂花搭仔玫瑰花个加持，真是好吃得勿得了。小孙囡放学转来，一口气吃脱两块。
仁昌顺个酒酿饼搭我小辰光吃过个勿大一样，平底镬子里向排列整齐，小火煎到两面黄，里向有实足个豆沙馅子，让我为伊最最颠狂个是，馅子里向悄悄叫个嵌了块糖油丁，水晶一样个剔透，一口咬破，脂香搭仔酒香混合，让人欲罢勿能啊。
苏州个麦芽塌饼搭上海郊区个也勿一样，郊区塌饼薄悠悠个，生坯搓成团子，再用手心揿扁，边缘勿大光滑，倒也别有一番风致，一般是呒没馅子个，煎熟或者蒸熟之后，糖油一浇就好了。勒西塘、同里、周庄搿些地方吃到个塌饼也是同样个画风。必过，仁昌顺个麦芽塌饼就高级了，大小、厚薄像只青团，两面滚满了白芝麻，里向有得豆沙瓜仁馅头个。
陆总介绍：勒伊小辰光，每年清明前半个号头，乡下头个亲眷就开始为制作塌饼准备材料了，先到田头选壮实个麦粒，勒水里向浸泡过夜，让伊发芽。等到芽头出齐之后，摊勒竹匾里，摆勒太阳下头曝晒，等干燥之后，就好磨成功细粉，过筛备用了。迭个辰光呢，田头溪旁个野生鼠曲草，又称为佛牙草，俗称紫念头，也刚好长出嫩枝新芽。大人会得叫屋里小囡去采，搿也成为了陆总童年辰光美好个记忆，三三两两结伴而行，可以搭大自然亲近亲近，真有为孔夫子所肯定个“莫春者，春服既成，冠者五六人，童子六七人，浴乎沂，风乎舞雩，咏而归”个况味。采好回来之后，连篮头带嫩芽勒河浜里汏清爽，回到屋里旺火焯熟，或者用踏踏滚个开水烫一烫也可以个，隔手沥干，切碎待用。
麦芽塌饼个味道甜润清凉，面皮当中含有麦芽糖，鼠曲草又富含植物纤维，勿单单香气清雅，还有助于肠胃蠕动，促进消化。
陆总还讲：鼠曲草性平味甘，本草集记载其有祛痰止咳之效，堪称“保健食品”。早年麦芽塌饼个制作受到季节限制，只有勒仲春时节个把号头里可以供应，入夏之后，鼠曲草茎叶变老，难以入料了。现在，时代进步了，仁昌顺已经通过物流冷链搭仔先进个保鲜储存技术，妥当个解决了迭个问题。
搿能讲来，麦芽塌饼是否是一年四季侪好吃到了呢？
麦芽塌饼一般是现做现吃个，仁昌顺个麦芽塌饼可以冷食，别有一番风味。
麦芽塌饼，本来是长江三角洲农家个土仪，但是各地制法各异，规格勿能统一，市场化程度邪气低，勿利于流通。搿歇，仁昌顺勿嫌比麻烦、简陋，拿迭只农家土特产做成功精美个茶食，相当于是为迭只古早味个传承定好了规矩，从此可以一跃而起、登堂入室了。
“古老而鲜活个味道，有穿透时空个力量，伊带牢仔个人情感搭仔群体记忆，潜行于每一只平凡个日脚。”搿是《风味人间》第三集里个解说词，假使配勒我一大口一大口吃麦芽塌饼个勿雅画面，各位以为哪能，赞伐？嗲伐？
作者：沈嘉禄
讲述：孙维陵
——————————————————
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
预览时标签不可点收录于合集#个上一篇下一篇
